Judg 17 | NdeIBE | STEP | Umuntu waselizweni lezintaba elako-Efrayimi owayethiwa nguMikha

Judges 17

Izithombe zikaMikha

1 Umuntu waselizweni lezintaba elako-Efrayimi owayethiwa nguMikha 2 wathi kunina, “Amashekeli esiliva angamakhulu alitshumi lanye athathwa kuwe njalo engakuzwa uwaqalekisa – ngilaso isiliva leso sikimi; yimi engasithathayo.” Unina wathi, “UJehova kakubusise, ndodana yami!”

3 Esewabuyisele kunina amashekeli esiliva angamakhulu alitshumi lanye, unina wathi, “Isiliva sami ngisahlukanisela uJehova ngokungxama ukuba indodana yami yenze isifanekiso esibaziweyo lesithombe esibunjiweyo. Ngizasibuyisela kuwe.”

4 Ngakho wasibuyisela isiliva kunina, unina wasethatha amashekeli angamakhulu amabili esiliva wawanika umkhandi wesiliva, owawabumba aba yisifanekiso lesithombe. Kwabekwa endlini kaMikha.

5 UMikha lo wayelendawo yokukhonzela, njalo wenza isambatho semahlombe kanye lezithombe, wasebeka enye yamadodana akhe ukuba ngumphristi wakhe. 6 Ngalezonsuku u-Israyeli wayengelankosi; umuntu wonke ezenzela ayekubona kulungile kuye.

7 Ijaha laseBhethilehema koJuda elalingumLevi, elalihlala phakathi kwabosendo lukaJuda, 8 lasuka kulowomuzi lidinga enye indawo yokuhlala. Ekuhambeni kwalo lafika endlini kaMikha elizweni lezintaba elako-Efrayimi.

9 UMikha walibuza wathi, “Uvela ngaphi na?” Lona lathi, “NgingumLevi ovela eBhethilehema koJuda, ngidinga indawo yokuhlala.”

10 UMikha wasesithi kulo, “Hlala lami ube ngubaba lomphristi wami, njalo ngizakupha amashekeli esiliva alitshumi ngomnyaka, izigqoko zakho kanye lokudla kwakho.”

11 Ngakho umLevi wavuma ukuhlala laye, njalo ijaha lelo kuye lalinjengenye yamadodana akhe.

12 UMikha wabeka umLevi ukuba ngumphristi wakhe, njalo ijaha lelo lahlala endlini yakhe.

13 UMikha wasesithi, “Khathesi sengisazi ukuthi uJehova uzakwenza okulungileyo kimi, njengoba umLevi lo esebe ngumphristi wami.”